لزوم الزووم
شعر
محمد الشحات محمد
ثَبِّتْ صورتك حَبّه يا عمْ
خلي جيوبك أُدَّام إيدك.
تلقى رصيدك ..
فار بزيادة ..
ومترو الحظ بطرف صباعك
لِفُّه بْسرعة، وْلو يوم باعك.
الرّكّاب هتْشِعّ تذاكر..
وانت تلم
بتقول هَم؟
هَم دا إيه؟
هِم يا سيدي، بلاش تطَّوَّح
الحق متر بلازما وْروَّح ..
قبل الأزمة متيجي وترجع
جوه الكاميرا تدوَّر، وتقول Cut
طيِّب Cut.
قول ما تقول .
بحر بهية اتباع..
حتى ياسين مزنوق في الشط.
شكلك بتفك الخط.
وتقول (أقوام) والبنزيم
والتبَّاع متْعوِّد في حجابه على التعزيم
دُش بخور.
ٱه يا لئيم.
ملياردير متعبي سوالف.
وتقول سَلَفي اتصور سِيلفي وسالف
كيس الدم؟!
فين الدم؟
ثَبِّتْ صورتك حَبّه يا عمْ
مليون فتوى على اليوتيوب
نفسي أتوب
بس اولادي خلاص قاطعوني.
فشلوا معايا وركبوا دماغهم
شٍد اللاي وامسك باغْهم
رح يتعاونوا معاك في مزاد.
سعرك زاد؟
ألا أوونا.. ألا دُو
زمن الفلَكه خلاص مدُّوه
وانت الجامد حامد ..
عامل خُطّ وْبنوِدُّوه
شكلك شاري وغاوي تنُط
فوق ع السطر الواقف عند الحبل
عايز تحجز دور من قبل.
عادي وجدا ..
ممكن تشرب ع الريحة وْمانو ودُوبل.
تكتب شعر، ومرة رواية، وترجع ثومة تغني اهواك
مبتفرقشي حليم دا حبيبنا .
اسأل حتى مخيمر ع التنبيه
العب بيييه.
لو هيقول لك .. خد لك فاصل
نادي لفيصل.
فصّل موجك ده ع الأدْ
اعمل آد، واوعى تفاصل يوم مع حدْ
اعزف تركي..
قصدي تشيللوا، كمان وتشلله.
زغلل رمش القلب بجد
بس نصيحة تداري كسوفك
إوعى السرساوي فْ مرة يشوفك
أصله مبيهزرشي وحاطط صورتك
جوه حبابي عنيه
إوعاك يوم يتنرفز ..
أو حتى يحبَّك
هيْلِبِّك، ويبعتر حَبَّك
ممكن عمَّار يضحك لكن
إياك لو حرَّكْت فْ ساكن
أو عرف انك شاري مساكن
مش باني الأصل وجاي ترْفيه
زي النادي، ساعاته بقت إفِّيه
ٱه لو عرف انّ مَلكْش فْ مذهب.
ابقى قابلني على الكوبليه
أصله دا باحث عُقْر مخضرم
بيرَقَّص ع السيكا الجاز
إوعى تخاف .. وتجيب جاز
إدي قفاك للكاميرا وْغمّض
البس على صدرك طقْم أزاز
لو مش فاهم يبقى تصُمْ
هو النَّيْزَك غايب ليه؟
ولا كورونا دي مسكت فيه؟
ميهمَّكش خلاص يا أبيه.
لو ترجع في حلوفْتك أوِّل
كان الأول .. فاسي بتعزق
طب دلوقتي بتزعق ع الأرض البور
لو لسَّه الدور
خد لك كارتة بعشرة جنيه
هتعدِّي مع الأنتيم
لو عاجبك علَّق تَمْ.
ومنقدرش نقول لك صاحبك خانك
ٱدي باكيتةْ سلوى عشان دُخَّانك
والتذكرة دي لزوم الزووم
عند الشم.
ثَبِّتْ صورتك حَبّه يا عمْ.
https://i.servimg.com/u/f97/16/45/10/25/a_ayac10.jpg